ନୁଆଦିଲ୍ଲୀ:-ଆନ୍ତର୍ଜାତିକ ଚାପ ସତ୍ତ୍ୱେ ରୁଷିଆ-ୟୁକ୍ରେନ ଯୁଦ୍ଧ ଥମିବା ବଦଳରେ ଅଧିକ ଉଗ୍ର ହେବାରେ ଲାଗିଛି। ଇତି ମଧ୍ୟରେ ଆମେରିକାରେ ୯/୧୧ ଆକ୍ରମଣ ଭଳି ୟୁକ୍ରେନ ରୁଷିଆ ଉପରେ ଡ୍ରୋନ ମାଡ କରିଛି। ୟୁକ୍ରେନ ସେନା ଦ୍ୱାରା ରୁଷିଆ ସାରାତୋଭ ସହରର ସବୁଠାରୁ ବଡ କୋଠାକୁ ଲକ୍ଷ୍ୟ କରି ଡ୍ରୋନ ଆକ୍ରମଣ କରାଯିବା ଯୋଗୁଁ ୩୮ମହଲାର ଏହି ପ୍ରକାଣ୍ଡ କୋଠାଟି ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି। ଏହାପରେ ରକ୍ତମୁଖା ରୁଷିଆ ୟୁକ୍ରେନ ଉପରେ ଘନଘନ କ୍ଷେପଣାସ୍ତ୍ର ମାଡ କରିବା ଯୋଗୁଁ ୟୁକ୍ରେନରେ ଆତଙ୍କ ଖେଳିଯାଇଛି। ରାଜଧାନୀ କିଭ୍ ଉପରେ ରୁଷିଆ ୧୦୦ରୁ ଅଧିକ କ୍ଷେପଣାସ୍ତ୍ର ମାଡ କରି ଭୟ ଓ ଆତଙ୍କର ବାତାବରଣ ସୃଷ୍ଟି କରିଛି। ଅନ୍ୟପକ୍ଷରେ ୟୁକ୍ରେନର ଆକ୍ରମଣ ଯୋଗୁ ରୁଷିଆର କେତେକ ସହରରେ ବିଦ୍ୟୁତ ସଂରବରାହ ବନ୍ଦ ହୋଇଯିବାରୁ ସହର ଅନେକ ଅଞ୍ଚଳରେ ଅନ୍ଧକାର ଛାଇଯାଇଛି। ଫେବୃଆରୀ ୨୦୨୨ରେ ମସ୍କୋ ପକ୍ଷରୁ ପ୍ରଥମେ ଏଠାରୁ ଆକ୍ରମଣ କରାଯାଇଥିଲା। ଅଢେଇ ବର୍ଷ ହେଲା ରୁଷିଆ-ୟୁକ୍ରେନ ଯୁଦ୍ଧ ଚାଲୁ ରହିଛି। ୟୁକ୍ରେନର ବହୁ ଅଞ୍ଚଳ ରୁଷିଆର କ୍ଷେପଣାସ୍ତ୍ର ମାଡରେ ଧୂଳିସାତ ହୋଇଯାଇଥିଲେ ମଧ୍ୟ ୟୁକ୍ରେନର ଆକ୍ରମଣରେ ରୁଷିଆର ବହୁ କ୍ଷୟକ୍ଷତି ଘଟିଛି।
