ବବି ଦେଓଲ୍ ଫିଲ୍ମ ‘ଆନିମଲ୍’ର ସଫଳତାକୁ ଖୁବ ଉପଭୋଗ କରୁଛନ୍ତି ଦର୍ଶକ। ଏହି ଫିଲ୍ମରେ ବବି ଜଣେ ଭିଲେନ୍ ରୂପରେ ନଜର୍ ଆସି ଦର୍ଶକଙ୍କ ମନକୁ ହଲାଇ ଦେଇଛନ୍ତି। ତାଙ୍କର ଚରିତ୍ର ଏବଂ ସ୍କ୍ରିନ୍ ପ୍ରେଜେଣ୍ଟ୍ ଯୋଗୁଁ ସେ ରଣବୀର କପୁରଙ୍କ ଉପରେ ମଧ୍ୟ ଭାରି ପଡିଛନ୍ତି। ବବି ବର୍ଷ ବର୍ଷ ଧରି ହିରୋ ହୋଇଥିଲେ ସୁଦ୍ଧା ଯେଉଁ ଖ୍ୟାତି ଅର୍ଜନ କରି ନ ଥିଲେ, ସେ ଏବେ ଭିଲେନ୍ ହୋଇ ଏହାକୁ ହାସଲ କରିପାରିଛନ୍ତି।ଅନେକ ବର୍ଷ ପରେ ବଡ ପରଦାକୁ ବବିଙ୍କ ପ୍ରତ୍ୟାବର୍ତ୍ତନ ଦର୍ଶକଙ୍କ ମନ କିଣିଛି। ଏହା ପୂର୍ବରୁ ତାଙ୍କୁ ଫିଲ୍ମ ‘ଲଭ୍ ହଷ୍ଟେଲ’ରେ ଏକ ଖଳ ଭୂମିକାରେ ଦେଖିବାକୁ ମିଳିଥିଲା, ଯଦିଓ ଏହି ଫିଲ୍ମଟି OTT ରେ ମୁକ୍ତିଲାଭ କରିଥିଲା। ‘ଆନିମଲ୍’ ତାଙ୍କର ଲୋକପ୍ରିୟତାକୁ ବହୁଗୁଣିତ କରିଦେଇଛି। ବର୍ତ୍ତମାନ ଆମେ ବବିଙ୍କୁ ଅନେକ ବଡ ବଡ ଫିଲ୍ମରେ ଭିଲେନ୍ ଭୂମିକାରେ ଦେଖିବାକୁ ପାଇବା। ବବି ଦେଓଲ୍ ‘ଆନିମଲ୍’ରେ ଅବରାର ହକ୍ ଚରିତ୍ରରେ ଅଭିନୟ କରିଛନ୍ତି। ଫିଲ୍ମରେ ତାଙ୍କର କୌଣସି ସଂଳାପ ନାହିଁ। ତଥାପି, ସେ ନିଜ ବଡି ଲାଙ୍ଗୁଏଜ୍ ଏବଂ ଏକ୍ସପ୍ରେସନ୍ରେ ଦର୍ଶକଙ୍କ ହୃଦୟକୁ ଜିତିଛନ୍ତି। ଏବେ ତାଙ୍କୁ ଦୁଇଟି ବଡ ସାଉଥ୍ ଫିଲ୍ମରେ ଭିଲେନ ଭୂମିକାରେ ଦେଖିବାକୁ ମିଳିବ। ତାମିଲ ସୁପରଷ୍ଟାର ସୁର୍ଯ୍ୟାଙ୍କ ବହୁ ପ୍ରତୀକ୍ଷିତ ଫିଲ୍ମ ‘କଙ୍ଗୁଭା’ରେ ବବି ଦେଓଲଙ୍କୁ ଏକ ଭିଲେନ୍ ଭୂମିକାରେ ଦେଖିବାକୁ ମିଳିବ। ୩୦୦ କୋଟି ଟଙ୍କା ବଜେଟ୍ରେ ଏହି ଫିଲ୍ମ ନିର୍ମାଣ କରାଯାଉଛି, ଯାହା ‘ଆନିମଲ୍’ ଠାରୁ ତିନି ଗୁଣ ଅଧିକ ବୋଲି ସୂଚନା । ଏହା ଏକ ପ୍ୟାନ୍ ଇଣ୍ଡିଆ ଚଳଚ୍ଚିତ୍ର, ଯେଉଁଥିରେ ଦିଶା ପଟାନିଙ୍କୁ ମଧ୍ୟ ଦେଖିବାକୁ ମିଳିବ। ‘କଙ୍ଗୁଭା’ର ପାୱାର୍ଫୁଲ୍ ଟିଜର ସୂର୍ଯ୍ୟାଙ୍କ ଜନ୍ମଦିନରେ ରିଲିଜ୍ ହୋଇଥିଲା। ତେବେ ନିର୍ମାତା ଏହାର ରିଲିଜ୍ ତାରିଖ ପ୍ରକାଶ କରିନାହାଁନ୍ତି। ରିପୋର୍ଟ ଅନୁଯାୟୀ ଏହା ୨୦୨୪ରେ ମୁକ୍ତିଲାଭ କରିବ। ଆହୁରି ମଧ୍ୟ ବବି ଦେଓଲଙ୍କୁ ପୱନ କଲ୍ୟାଣଙ୍କ ଅଭିନୀତ ‘ହରି ହରା ବୀରା ମଲ୍ଲୁ’ରେ ଭିଲେନ ଭୂମିକାରେ ମଧ୍ୟ ଦେଖିବାକୁ ମିଳିବ। ଫିଲ୍ମଟି ପ୍ରସ୍ତୁତ ହୋଇଯାଇଛି, କିନ୍ତୁ ପୱନଙ୍କ ପ୍ରତିଶ୍ରୁତି କାରଣରୁ ଏହାର ରିଲିଜ୍ ତାରିଖ ଚୂଡାନ୍ତ ହୋଇନାହିଁ। ତେବେ ଆସନ୍ତା ବର୍ଷ ଏହାର ରିଲିଜ୍ ହେବାର ସମ୍ଭାବନା ରହିଛି। ଏହା ବ୍ୟତୀତ, ୱେବ୍ ସିରିଜ୍ ‘ଆଶ୍ରମ’ରେ ଆମେ ବବି ଦେଓଲଙ୍କୁ ଏକ ଖଳ ଚରିତ୍ରରେ ଦେଖିସାରିଛୁ। ଏହାର ୩ଟି ସିଜିନ୍ ଆସିଛି। ପରବର୍ତ୍ତୀ ସିଜିନ୍ରେ ତାଙ୍କୁ ଭୟଙ୍କର ଭାବେ ଦେଖିବାକୁ ମିଳିବ। ଅଦିତି ପୋହନକରଙ୍କ ଚରିତ୍ର ପମ୍ମି ବାବା ନିରାଲାଙ୍କଠାରୁ ପ୍ରତିଶୋଧ ନେଉଥିବାର ନଜର ଆସିବେ।
